Robotlar futbol oýnaýar: Pekinde mekdep okuwçylarynyň arasynda ilkinji ýaryş geçirildi
Robotlar futbol oýnaýar: Pekinde mekdep okuwçylarynyň arasynda ilkinji ýaryş geçirildi. Bu fantastika-da däl, tomaşa hem däl — bu hakykat. Robotlar meýdançada ylgap, topy biri-birine geçirýär, gol urýar we ýeňşini belleýär. Pekinde ilkinji gezek adam şekilli robotlaryň arasynda futbol ýaryşy geçirildi. Onda mekdep okuwçylary robotlaryň her bir ädimini programmirlemek arkaly olary dolandyrdylar. Tehnologiýalar futbol meýdançasyna çykdy we bu tomaşa görenleri haýrana galdyrdy.
Aprel aýyndan bäri Pekiniň we Sýunanyň (Xiong’an) ýokary synp okuwçylary ýaryşa taýýarlyk görüp, boýy takmynan 1,2 metr bolan Acceleration Evolution T1 kysymly robotlary programmirlediler. Final duşuşyklary Sinhua (Tsinghua) uniwersitetiniň orta mekdebinde geçirildi. Tomaşaçylar duýgularyny gizläp bilmediler — robotlar takyk urgulary we toparlaýyn sazlaşykly oýny görkezdiler.
A toparynyň finalynda Pekiniň 4-nji mekdebiniň Situo Mecha topary 171-nji mekdebiň Flag Raiders toparyndan ýeňildi. Ýeňlen toparyň kapitany: «Biz bilelikde işlemegi öwrendik, iň möhümi hem şol» diýip belledi. Guramaçylar robot-futbolyň diňe bir oýun bolman, eýsem okuwçylaryň programmirlemegi we inženerçilik ukyplaryny bäsleşikler arkaly özleşdirmegine ýardam berýän güýçli bilim guralydygyny nygtadylar.
Bu ýaryş adam şekilli robotlaryň Bütindünýä oýunlaryna saýlama tapgyry hem boldy. Ýeňijiler 19 ýaşa çenli gatnaşyjylar kategoriýasynda halkara derejede geçiriljek ýaryşda çykyş etmäge hukuk gazandylar. Bu barada CCTV+ habar berdi. Geljegiň sporty eýýäm geldi — we ol robotlar bilen baglanyşykly.
