Hytaýyň birnäçe sebitinde güýçli ýagyşlara we süýşgün howpuna taýýarlyk görülýär
Tebigat howlukmany halamaýar, emma onuň duýduryşlary çalt hereket etmegi talap edýär. Asmandan ýere güýçli ýagyş suwlary inende, her bir sagatlyk gijä galmak gymmat düşüp biler. Hytaýyň meteorologlary we halas ediş gulluklary adamlary hem-de infrastrukturalary tebigy betbagtçylyklardan goramak üçin ýene-de tebigy hadysalara garşy göreşe girişdi. Birnäçe gün bäri dowam edýän güýçli ýagyşlar birnäçe welaýatyň häkimiýetlerini taýýarlyk derejesini ýokarlandyrmaga mejbur etdi.
Sişenbe güni Hytaýyň meteorologiýa gulluklary güýçli ýagyşlar we howply howa hadysalary barada duýduryş berdiler. Çaklamalara görä, çarşenbe gününden anna gününe çenli ýurduň demirgazyk we demirgazyk-merkezi sebitlerinde güýçli ýagynlar bolar.
Şeýle hem Ýanszy derýasynyň günortasynda ýerleşýän Szýannan sebiti hem-de Henan, Anhoý, Szýansu we Şandun welaýatlaryny öz içine alýan Huanhuaý sebiti güýçli ýagyşlardan ejir çeker diýlip garaşylýar.
Pekin şäherinde duşenbe güni gysga wagtlyk ýagan güýçli ýagyş bir sagadyň dowamynda 30 millimetrden gowrak ýagyn getirdi. Şonuň netijesinde şäher häkimiýetleri güýçli ýagyşlar, geologik howplar we daglyk ýerlerde döreýän sil hadysalary boýunça gök derejeli duýduryş yglan etdi.
Duşenbe güni paýtagtda suw joşgunlary möwsüminiň iň işjeň döwrüniň başlanandygyny alamatlandyrdy we şäherde adatdan daşary ýagdaýyň dördünji derejesi girizildi.
Týanszin şäherinde güýçli ýagyşlar birnäçe ýoly suw astynda galdyrdy, häkimiýetler bolsa gyssagly drenaž işleri ýola goýdular.
Hebeý welaýatynda 45 meteorologiýa bekedi 50 millimetrden gowrak ýagyn hasaba aldy. Welaýatda sary we mämişi derejeli duýduryşlar yglan edildi.
Şansi welaýaty hem ýyldyrymly ýagyşlar we güýçli şemallar sebäpli gök derejeli duýduryş berdi.
Ýurduň günortasynda ýerleşýän Guansi sebitiniň gündogar we kenarýaka etraplarynda hem güýçli ýagyşlara garaşylýar.
Suw hojalygy ministrliginiň maglumatlaryna görä, sekiz welaýatdaky 15 derýada suwuň derejesi howply çäkden ýokary bolmagynda galýar. Iň ýokary artykmaçlyk 2,29 metre ýetdi.
Ministrlik Guansi, Hubeý we Hunan welaýatlary üçin adatdan daşary ýagdaýyň dördünji derejesini saklap galdy.
Hytaýda suw joşgunlary möwsümi her ýyl iýul aýynyň ahyryndan awgust aýynyň başyna çenli dowam edýär. Bu ýyl möwsüm güýçli ýagyşlar bilen başlandy.
Hytaýda duýduryş ulgamy dört derejeden ybarat bolup, olaryň dördünji derejesi iň pes howp derejesi hasaplanýar.
Häkimiýetler ýagdaýy yzygiderli gözegçilikde saklamak, mümkin bolan süýşgünleriň we suw joşgunlarynyň öňüni almak üçin ähli zerur serişdeleri işe girizdiler.
CCTV+ agentliginiň habar bermegine görä, meteorologlar siklonyň ösüşine gözegçiligini dowam etdirýärler. Zyýan çekmegi ähtimal sebitleriň ýaşaýjylaryna bolsa ähli howpsuzlyk çärelerini berjaý etmek maslahat berilýär.
