Haýnan Erkin Söwda Porty tutuş ada boýunça ýörite gümrük amallaryny geçirmäge taýýarlanýar
Hytaýyň Haýnan Erkin Söwda Porty (FTP) 18-nji dekabrda işe girizilmegi meýilleşdirilen tutuş ada derejesindäki ýörite gümrük amallaryna taýýarlanýar. Bu çäre söwdany tizleşdirmäge, täze ykdysady mümkinçilikleri döretmäge we ilata hem-de işewürlere amatlyklary artdyrmaga gönükdirilendir.
Haýnanyň global deňiz ulag merkezi hasaplanýan Ýanpu portuny giňeltmek taslamasy güýçli depginde dowam edýär. Taslamanyň çäginde 13 esasy kategoriýa boýunça 100-den gowrak kiçi taslama ýerine ýetirilýär. Olaryň köpüsiniň noýabr aýyna çenli tamamlanmagyna garaşylýar. Giňeldiş tamamlanandan soň, port dünýäniň iň uly konteýner gämilerini kabul edip biljek, salgytsyz getirip bolýan harytlaryň sany 1900-den takmynan 6600-ä çenli artar — bu salgyt tölenýän ähli harytlaryň 74%-ine golaýyny emele getirýär.
Ýörite gümrük düzgünini ýola goýmak bilen baglanyşykly ähli işler meýilnama laýyk dowam edýär. Sekiz açyk portuň we ikinji derejeli 10 ulag merkeziniň enjamlary işe taýýar. Synaglaýyn işler hem ýokary depginde alnyp barylýar.
Bu taýýarlygyň çäginde alty sany ýörite gümrük syýasaty we welaýat derejesinde 13 sany goşmaça kadalaşdyryjy hukuknamalar kabul edildi. Maksat — erkin söwda portunyň syýasat üstünligini ykdysady ösüşe öwürmek, sebit hem-de halkara işewürler üçin täze bazar mümkinçiliklerini döretmek we olary giňeltmekdir.
Haýnan FTP 2026–2030-njy ýyllary öz içine alýan 15-nji bäşýyllyk döwürde ýokary derejeli açyk ykdysadyýeti ösdürmegi dowam edip, portuň institusional gurluşyny berkider hem-de maýa goýumlary, tehnologiýalary, zehinleri we maglumatlary çeker. Strategiki maksat — ada boýunça iň ýokary derejeli “açyk synag meýdançasyny” döretmek we dünýä ykdysadyýeti bilen has-da ýakyn utgaşyklygy gazanmak.
