Hytaýda ilkinji gezek agyr ýük göteriji dron görkezildi
Daglyk ýerlerde elektrik ulgamyny gurmak bilen baglanyşykly logistika kynçylyklary ýeňip geçmek we daşky gurşawy gorap saklamak maksady bilen, Hytaýyň günorta-günbataryndaky Çunsin häkimligi elektrik geçiriji diň materiallaryny daşamakda agyr ýük göteriji dronlaryny ulandy. Bu geçirilen iş 15 diňi öz içine alýan 35 kilowoltlyk Situ hatarynyň abatlaýyş taslamasynyň bir bölegidir. Ýakynda geçirilen işde dron 289 kilogram polat böleklerini daşady we olary 20 minudyň içinde diňiň ýokarsyna eltip berdi.
Dronlar dik ýapgytlarda ýerleşýän 15 diňiň hemmesine jemi125,44 tonna iş materiallaryny daşady. Taslama hünärmeniniň sözlerine görä, bu usul uly artykmaçlyklary berýär: dronlar päsgelçilikleriň üstünden göni uçup bilýär, aýlawly ýollary gurmak zerurlygyny aradan aýyrýar we diňe ýük eltip bermek wagtyny üç günden ýarym güne çenli gysgaldýar. Bu, şeýle hem, köneçil usullar bilen deňeşdirilende umumy çykdajylary ep-esli azaldýar.
Mundan başga-da, dronlary ulanmak wagtlaýyn ýollary gurmak we agaçlary kesip aýyrmak zerurlyklaryny aradan aýyrýar, şeýlelik bilen tokaýlary we dag ösümliklerini gorap saklamaga mümkinçilik berýär. Dronlary ulanmak atmosfera bölünip çykýan uglerod zyňyndylaryny azaltmak we daşky gurşawa ýetirilýän zyýany çäklendirmek arkaly infrastrukturany kämilleşdirmekde ekologiýa durnuklylygyny we ykdysady netijeliligi gazanmaga mümkinçilik berýär.
