Si Szinpin KHDR-niň Ministrler Kabinetiniň başlygy bilen duşuşdy
Hytaýyň Kommunistik partiýasynyň Merkezi Komitetiniň Baş sekretary, Hytaý Halk Respublikasynyň Başlygy Si Szinpin 10-njy iýulda, Pekinde Koreýa Halk Demokratik Respublikasynyň (KHDR) Ministrler Kabinetiniň başlygy Pak The Son bilen duşuşdy.
Pak The Son şol bir wagtyň özünde Koreýanyň Zähmet partiýasynyň Merkezi Komitetiniň Syýasy býurosynyň Prezidiumynyň agzasy hem-de Koreýa Halk Demokratik Respublikasynyň Döwlet geňeşiniň başlygynyň orunbasary wezipesini eýeleýär.
Si Szinpin geçen aý Koreýa Halk Demokratik Respublikasyna amala aşyran döwlet saparynyň dowamynda özüniň we Koreýanyň Zähmet partiýasynyň Baş sekretary Kim Çen Ynyň iki ýurduň arasyndaky däp bolan dostlukly gatnaşyklary ösdürmegiň strategik ugruny bilelikde kesgitländigini, şeýle hem bu gatnaşyklary täze döwrüň mazmuny bilen yzygiderli baýlaşdyrmak barada ylalaşandyklaryny ýatlap geçdi.
Şu ýyl Hytaý Halk Respublikasy bilen Koreýa Halk Demokratik Respublikasynyň arasynda Dostluk, hyzmatdaşlyk we özara kömek hakynda şertnamanyň baglaşylmagynyň 65 ýyllygy bellenildi. Bu şanly seneden peýdalanyp, iki döwletiň ýolbaşçylary halklary Hytaý bilen Koreýa Halk Demokratik Respublikasynyň arasyndaky däp bolan dostlugy gorap saklamaga we mundan beýläk-de ösdürmäge ruhlandyrýan ylalaşyklary gazandylar. Bu bolsa täze taryhy döwürde ikitaraplaýyn gatnaşyklaryň ösüşi üçin egsilmez güýç we durmuş çeşmesi bolup hyzmat eder diýip, Si Szinpin aýtdy.
Hytaý Halk Respublikasynyň Başlygy, şeýle hem, strategik durnuklylygy saklamagy, strategik ynamy berkitmegi, iki ýurduň ýolbaşçylarynyň gazanan ylalaşyklaryny durmuşa geçirmegi hem-de iki partiýanyň we iki döwletiň arasyndaky gatnaşyklaryň döwrüň talaplaryna laýyklykda yzygiderli ösdürilmegini üpjün etmegi tabşyrdy.
Şunuň bilen baglylykda, Si Szinpin strategik hyzmatdaşlygy pugtalandyrmagyň, iki döwletiň özygtyýarlygyny, howpsuzlygyny we ösüş bähbitlerini berk goramagyň, şeýle hem iki ýurduň öz milli aýratynlyklaryna laýyk gelýän sosializm ýolunda ynamly öňe gitmegini goldajak amatly halkara şertleri döretmegiň zerurdygyny belledi.
Öz gezeginde Pak The Son Si Szinpine Kim Çen Ynyň mähirli salamyny ýetirdi.
Ol Koreýa Halk Demokratik Respublikasynyň iki partiýanyň we iki döwletiň ýokary derejeli ýolbaşçylarynyň gazanan möhüm ylalaşyklaryny yzygiderli durmuşa geçirjekdigini, Taýwan meselesi ýaly Hytaýyň esasy milli bähbitlerini goramakda Hytaýy berk goldajakdygyny hem-de iki ýurduň agzybirligini, dostlugyny we sosialistik işini täze, has ýokary derejä çykarmak üçin ähli tagallalary etjekdigini aýtdy.
