Kanton ýarmarkasyna taýýarlyk işleri gyzgalaňly dowam edýär
Söwda hemişe medeniýetleriň arasynda köpri bolup, ösüşiň esasy hereketlendiriji güýji bolup geldi. Ýedi onýyllyga golaý wagt bäri geçirilip gelinýän Kanton ýarmarkasy Hytaýyň dünýä açyklygynyň, harytlar, tehnologiýalar we pikirler alyşmaga taýýardygynyň janly nyşany bolmagynda galýar. Her täze möwsüm diňe täze önümleri däl, eýsem hyzmatdaşlyk üçin täze mümkinçilikleri hem getirýär. Bu bolsa sanlylaşdyrma eýýamynda-da öndürijiler bilen alyjylaryň ýüzbe-ýüz aragatnaşygynyň gymmatyny ýitirmeýändigini tassyklaýar.
Söwda çäresi 15-nji oktýabrdan 4-nji noýabra çenli Hytaýyň günortasyndaky Guandun welaýatynyň Guançžou şäherinde geçiriler. Sergi meýdançasynyň umumy meýdany 1,55 million inedördül metre barabar bolar. Onda 54 ýöriteleşdirilen zolakda 75 700 sergi diwarlygy ýerleşdiriler.
Sergi üç tapgyrda geçiriler we olaryň her biri «öňdebaryjy önümçilik», «ýokary hilli öý durmuşy» hem-de «has gowy durmuş» atly mowzuklar boýunça dürli haryt toparlaryna bagyşlanar.
«Sergä taýýarlyk işleri kadaly dowam edýär, eksport sergisi üçin diwarlyklar boýunça arzalar eýýäm tabşyryldy. Ýarmarkada hyzmat ediji robotlar, saglygy goraýyş üçin akylly çözgütler, sarp edijiler üçin niýetlenen dronlar, geýilýän elektron enjamlary, ýygnalýan jaýlar we täze hilli önümçilik güýçlerini görkezýän beýleki öňdebaryjy önümler ilkinji gezek hödürlener» diýip, Kanton ýarmarkasynyň söwda bölüminiň başlygynyň orunbasary Din Şuan aýtdy.
1957-nji ýylda esaslandyrylan Kanton ýarmarkasy her ýylda iki gezek Guançžou şäherinde geçirilýär. Ol Hytaýdaky iri halkara söwda çäreleriniň arasynda iň uzak wagt bäri yzygiderli geçirilýän ýarmarka bolup, ýurduň daşarky söwdasynyň barometri hasaplanýar.
Ýyllaryň dowamynda bu ýarmarka hytaý eksport edijileri bilen daşary ýurtly alyjylaryň duşuşýan iň möhüm meýdançalarynyň birine öwrülip, 200-den gowrak ýurt we sebit bilen söwda gatnaşyklarynyň ösmegine ýardam berdi.
CCTV+ agentliginiň habar bermegine görä, öňde boljak güýzki sessiýa dünýäniň dürli künjeklerinden onlarça müň gatnaşyjyny özüne çeker we Kanton ýarmarkasynyň dünýä işewürlik senenamasyndaky iň möhüm çäreleriň biri hökmündäki ornuny ýene-de bir gezek tassyklar.
