Şençžen robototehnikanyň ösüşini çaltlandyrýar we elýeterli ekzoskeletleri döredýär
Tehnologiýalar diňe saýlanan adamlaryň elinde galman, barlaghanalardan çykyp, gündelik durmuşyň aýrylmaz bölegine öwrülýär. Ýakyn wagta çenli diňe ylmy-fantastiki filmlerde duş gelinýän ekzoskeletler häzirki wagtda zähmeti we gündelik hereketleri ýeňilleşdirýän hakyky gurallara öwrülýär. Şäher ekoulgamy bitewi mehanizm hökmünde işleýän, önümçilik zynjyry bolsa birnäçe sagadyň dowamynda tamamlanýan şertlerde iň batyrgaý pikirleriň hem durmuşa geçirilmegine mümkinçilik döredilýär. Uly Aýlag sebitiniň ýüregi hasaplanýan Şençžen robototehnikanyň geljeginiň sessiz ylmy merkezlerde däl-de, eýsem startaplaryň, maýadarlaryň we inženerleriň janly hyzmatdaşlygynda döredilýändigini subut edýär.
Guandun–Gonkong–Makao Uly Aýlag şäherler toplumynyň ösen önümçilik zynjyry we amatly döwlet syýasaty netijesinde Hytaýyň günortasyndaky Şençžen tehnologik merkezi robototehnikanyň ösüşini çaltlandyrýar we ýerli startaplara robotlaşdyrylan enjamlary döretmek baradaky pikirlerini durmuşa geçirmäge mümkinçilik berýär. Nanşan etrabynda ýerleşýän Hypershell Technology (Shenzhen) Co., Ltd. kompaniýasynda ekzoskeletleri öndürmek bilen meşgullanýan synagçylar ekzoskeletleri geýip ýöreýärler we şol bir wagtda maglumatlary sazlaýarlar. Enjam aňsat geýilýär, ulanyjynyň aýagyny galdyrmak ýa-da düşürmek niýetini dessine kesgitleýär hem-de bud bölegine goldaw berýär. Ulanyjylar ony uzak wagtlap ulananda hem agyry ýa-da ýadawlyk duýmadyklaryny belleýärler.
Kompaniýanyň esaslandyryjysy Sun Kuan 1990-njy ýyllardan soň doglan ýaş telekeçi bolup, aspiranturada ekzoskeletleri modelirlemek boýunça ýöriteleşdi. Ol we onuň topary gymmat bahaly lukmançylyk ekzoskeletlerini gündelik durmuşda ulanmaga niýetlenen elýeterli enjamlara öwürmegi maksat edinýärler.
«Ekzoskeletleri işläp taýýarlamak dürli ugurlary birleşdirýän taslamadyr. Şençžende biz dürli pudaklaryň hünärmenlerini jemläp bilýäris we örän gysga wagtda zerur bolan ähli üpjün edijileri tapýarys. Irden şaýlaryň nusgalaryny iberýäris, agşama çenli bolsa olary taýýar görnüşde alýarys» diýip, Sun Kuan aýtdy.
Uly Aýlag sebitindäki doly önümçilik zynjyry enjamlaryň işlenip taýýarlanylmagyny ep-esli çaltlaşdyrdy. Ýerli häkimiýetler startaplara önümçilik meýdançalaryny, maýa goýumlaryny, önümleri synagdan geçirmek we ulanmak üçin şertleri, şeýle hem hünärmenler bilen üpjünçiligi öz içine alýan toplumlaýyn hyzmatlary hödürleýärler.
Nanşan etrabynyň Senagat we maglumat tehnologiýalary býurosynyň esasy pudaklar bölüminiň ýolbaşçysy Wan Sýaomeý şeýle diýdi:
«Adam şekilli robotlar pudagynyň täze meýdanynda Nanşan diňe taýýar robotlary öndürýän 25-den gowrak kompaniýany jemledi. Döredilen telekeçilik gurşawy kompaniýalary tejribe alyşmaga we hyzmatdaşlyk etmäge höweslendirýär. “Robotlar jülgesinde” köp sanly uniwersitetler we ylmy-barlag institutlary hem ýerleşýär. Çyzgylary taýýarlamakdan başlap, ilkinji nusgany öndürmek we synagdan geçirmek tapgyryna çenli kompaniýalar her ädimde hyzmatdaş tapyp bilýärler».
Guandun–Gonkong–Makao Uly Aýlag şäherler toplumy Hytaýyň iň depginli ösýän ykdysady sebitleriniň biri bolup, öňdebaryjy önümçiligi, ylmy-barlaglary we amatly döwlet syýasatlaryny özünde birleşdirýär. Şençžen sebitiň tehnologik merkezi hökmünde robototehnika, emeli aň we beýleki baglanyşykly pudaklara zehinli hünärmenleri hem-de maýa goýumlaryny işjeň çekýär.
CCTV+ agentliginiň habar bermegine görä, Şençžende robototehnika boýunça startaplaryň çalt ösmegi işewürligiň, ylmyň we döwletiň netijeli hyzmatdaşlygynyň innowasion pikirleri giň köpçülik üçin elýeterli taýýar önümlere öwürmäge ukyplydygyny aýdyň görkezýär.
