Sinszýanda ýeriň üstki gatlagynyň temperaturasy 84°C-e ýetdi, garlaryň eremegi bolsa suw joşmalaryna sebäp boldy
Tebigat seýrek ýagdaýda durnuklylyk görkezýär, esasan-da, jokrama yssy çöller bilen garly dag gerişleriniň ýanaşyk ýerleşýän ýerlerinde. Günüň daşlary küle öwürýän mahaly, daglardaky buzlar yssa çydaman eräp, suw akymlary görnüşinde jülgelere inýär. Şeýle pursatlarda adam iki tebigy güýjüň arasynda galýar. Bu bolsa tebigatyň sahawatlylygy bilen gazabynyň biri-biri bilen utgaşýan şertlerinde ýaşamagy öwrenmeli bolýan döwürdir. Şeýle ýagdaýlar islendik deňagramlylygyň näderejede näzikdigini ýatladýar.
Hytaýyň demirgazyk-günbataryndaky Sinszýan-Uýgur awtonom sebitiniň birnäçe etrabynda aşa howa şertleri hasaba alyndy. Turfan sebitinde meşhur Otly daglar birnäçe günden bäri güýçli yssynyň täsirinde galýar. Ýeriň üstki gatlagynyň temperaturasy 84 gradus selsiýa çenli ýetdi. Meteorologlaryň düşündirişine görä, aşa yssy Turfan sebitiniň ýapyk relýefi, açyk gaýalyk ýüzleri we günüň uzak wagtlap şöhle saçmagy bilen baglanyşyklydyr. Bu şertler howanyň has-da gyzmagyna sebäp bolýar.
Şol bir wagtyň özünde, uzak wagtlap dowam eden yssy howa Kunlun daglaryndaky garlaryň eremegine sebäp bolup, Baýingolin Mongol awtonom prefekturasynyň Çýomo etrabynda ýerli suw joşmalaryny döretdi. Aoýýalak şäherinde joşan suwlar Gobi çölüniň içinden geçýän awtomobil ýollarynyň käbir böleklerini äkitdi ýa-da olara zeper ýetirdi, netijede ulag gatnawynda bökdençlik döretdi. Ýerli häkimiýetler arassalamak, ýollary abatlamak hem-de berkitmek, şeýle-de suw akdyryjy ýaplary çuňaltmak we olardaky böwetleri aýyrmak üçin agyr tehnikalary işe girizdiler. Bu çäreler hereket howpsuzlygyny üpjün etmek maksady bilen amala aşyryldy. Her ýyl gaýtalanýan suw joşmalary möwsüminiň öňisyrasynda häkimiýetler öýme-öý aýlanyp, daýhanlara we maldarlara howpsuzlyk düzgünleri, şeýle hem daglyk ýerlerde duýdansyz ýüze çykýan suw joşmalarynyň öňüni almak we olardan goranmak usullary barada düşündiriş işlerini geçirýärler.
Turfan çöketligi — Hytaýyň we dünýäniň iň yssy ýerleriniň biridir. Bu ýerde ýeriň üstki gatlagynyň rekord derejedäki temperaturasy yzygiderli hasaba alynýar. Sinszýanyň günortasynda uzalyp gidýän Kunlun daglarynda uly buzluklar ýerleşýär. Olaryň tomus aýlarynda eremegi — tebigy hadysadyr. Şeýle-de bolsa, şu ýylky adatdan daşary yssy bu prosesi has-da güýçlendirip, infrastruktura we oba hojalygyna howp salýar.
“CCTV+”-iň habar bermegine görä, halas ediş gulluklary ýagdaýa yzygiderli gözegçilik edýärler. Zeper ýeten sebitlerde ulag gatnawyny dikeltmek maksady bilen ýol abatlaýyş işleri gije-gündizleýin dowam etdirilýär.
