Hytaýyň Kommunistik partiýasy: korrupsiýa garşy göreşiň we öz-özüni kämilleşdirmegiň 105 ýyly
Hytaýyň Kommunistik partiýasy: korrupsiýa garşy göreşiň we öz-özüni kämilleşdirmegiň 105 ýyly. Hytaýyň Kommunistik partiýasynyň (HKP) döredilmeginiň 105 ýyllygy mynasybetli bilermenler partiýanyň uzak möhletleýin durnuklylygyny we üstünliklerini onuň korrupsiýa garşy göreşe hem-de dolandyryşda arassalygy üpjün etmäge gönükdirilen öz-özüni kämilleşdirmek syýasaty bilen baglanyşdyrýarlar. Bir asyrdan gowrak taryhy bolan partiýa diňe bir häkimiýetini saklap galman, eýsem jemgyýetiň ynamyny hem gorap bildi. Munuň esasy sebäbi berk düzgün-nyzam, partiýanyň hatarlaryny arassalamak we korrupsiýa ýol beren wezipeli adamlara garşy berk çäre görmek syýasaty bilen düşündirilýär.
Pekin şäherindäki HKP-niň Partiýa mekdebiniň düzümindäki partiýa ruhuny terbiýelemek we partiýany hemmetaraplaýyn berk dolandyrmak merkezinde öz-özüni düzgünleşdirmek ýörelgeleri interaktiw sergiler arkaly görkezilýär. Bu sergilerde görelde alarlyk döwlet işgärleriniň tejribesi bilen birlikde korrupsiýa bilen bagly duýduryş häsiýetli mysallar hem ýerleşdirilýär. Partiýa döredilen ilkinji günlerinden başlap berk syýasy we guramaçylyk düzgünlerini esasy ýörelge hökmünde kabul edip gelýär.
2012-nji ýylda geçirilen HKP-niň XVIII gurultaýyndan bäri ýurtda giň gerimli korrupsiýa garşy göreş alnyp barylýar. Onuň maksady ähli derejedäki partiýa we döwlet işgärleriniň korrupsiýa ýol bermegine mümkinçilik döretmezlik, şeýle hem olarda beýle islegiň döremeginiň öňüni almakdan ybaratdyr.
Pekin şäher komitetiniň Partiýa mekdebiniň dosenti Gu Ýan döwlet Baştutanynyň öňe süren ýörelgelerine daýanyp, pikirleri jebisleşdirmegiň, umumy ylalaşygy gazanmagyň, işgärleriň hünär derejesini ýokarlandyrmagyň we döwrebap dolandyryş ukybyny ösdürmegiň möhüm ähmiýete eýedigini aýtdy.
Resmi maglumatlara görä, 2025-nji ýylda Hytaýyň düzgün-nyzam gözegçiligi edaralary 1 milliondan gowrak işi derňäp, korrupsiýa bilen baglanyşykly 983 müň adama düzgün-nyzam ýa-da dolandyryş temmilerini ulandy.
Hytaýyň Jemgyýetçilik ylymlary akademiýasynyň Marksizm institutynyň partiýa komitetiniň sekretary Lo Wendun daşarky gözegçilik bilen içerki öz-özüňe gözegçiligiň bilelikde partiýanyň öňdebaryjy ornuny we uzak möhletleýin dolandyryş ukybyny pugtalandyrýandygyny belledi. Şeýle hem onuň aýtmagyna görä, Kennedi adyndaky Garward mekdebiniň Hytaýda on ýyldan gowrak wagt bäri geçiren pikir soraşmalary hytaý raýatlarynyň hökümete bolan ynamynyň yzygiderli 90 göterimden ýokarydygyny görkezýär.
Daşary ýurtly synçylar hem HKP-niň korrupsiýa garşy alyp barýan syýasatyna üns çekýärler. Hytaýyň halkara kommunikasiýa toparynyň neşirýatynyň iňlis dilindäki neşiriniň hormatly baş redaktory Deýwid Fergýuson bu kampaniýanyň üç aýratynlygyny görkezdi: onuň ulgamlaýyn häsiýete eýe bolmagy, ýokary derejeli ýolbaşçylary-da, pes derejeli işgärleri-de («ýolbarslar we çybynlar») deň derejede jogapkärçilige çekmegi hem-de kabul edilýän çäreleriň iş ýüzünde amala aşyrylmagy.
1921-nji ýylda döredilen Hytaýyň Kommunistik partiýasynyň häzirki wagtda 99 milliondan gowrak agzasy bar. 2012-nji ýylda başlanan korrupsiýa garşy göreş Hytaýyň taryhyndaky iň giň gerimli kampaniýalaryň biri hasaplanýar. «Ýolbarslar we çybynlar» diýen aňlatma ýokary wezipeli ýolbaşçylaryň hem, ýerli derejedäki ownuk korrupsiýa ýol berýän işgärleriň hem kanunyň öňünde deň jogapkärçilik çekýändigini aňladýar.
2026–2030-njy ýyllary öz içine alýan 15-nji bäşýyllyk meýilnamanyň öňüsyrasynda Hytaýyň ýokary derejeli ýolbaşçylygy ygtyýarlyklary kanunçylyk we institusional mehanizmler arkaly has netijeli çäklendirmegi hem-de korrupsiýa garşy göreşi has yzygiderli dowam etdirmegi möhüm wezipe hökmünde kesgitledi.
CCTV+ agentliginiň habar bermegine görä, HKP döredilmeginiň 105 ýyllygy döwründe hem partiýa düzgün-nyzamy pugtalandyrmagy we korrupsiýa garşy göreşi dowam etdirmegi ileri tutup, täze bäşýyllyk ösüş maksatlaryna ýetmek üçin ygtybarly esas döretmegi maksat edinýär.
