Hytaýyň Ýongžou şäheri sport-medeniýet-syýahatçylyk çärelerini utgaşdyrýar
Hepdäniň anna güni Hytaýyň merkezindäki Hunan welaýatynyň Ýongžou şäherinde bu ýeriň at-abraýyny galdyrmak hem-de syýahatçylary çekmek maksady bilen sport-medeniýet-syýahatçylyk çärelerini utgaşdyrmak arkaly mahabatlandyryş işlerine bat berildi.
Hytaýyň gözleg maglumat tehnologiýalary kompaniýasy we Ýongžou şäheriniň Senagat we söwda federasiýasy tarapyndan gurnalan bu çäräniň açylyş dabarasy Pekiniň Dasin halkara howa menzilinde geçirildi. Bu mahabatlandyryş çäresi Hytaýyň Birleşen Howa Ýollarynyň uçuş hyzmatlaryny, “Sian Çao” ady bilen tanalýan Hunan Super Ligasyny hem-de Ýongžou şäheriniň baý syýahatçylyk mümkinçiliklerini birleşdirip, syýahatçylary çekmeklige we syýahatçylygy ösdürmeklige gönükdirilendir.
”Biz diňe Superliganyň çykyşlaryndan lezzet almak bilen çäklenmän, şol sanda Ýongžou şäheriniň baý medeniýetini köplere tanyşdyrmak üçin hem öz dogduk mekanymyza gaýdyp barýarys. Siz ol ýere barsaňyz, ýerli halkyň hakyky myhmansöýerligine göz ýetirersiňiz” diýip, Pekiniň Ýongžou söwda palatasynyň baş sekretary Tang Maoguo gürrüň berýär.
Ýongžou bilen gyzyklanýanlaryň ählisini bu şähere baryp görmäge çagyrmak bilen, China United Airlines awiakompaniýasy tarapyndan howa gatnawlarynyň gündelik amala aşyrylýandygy barada Ýongžou şäher halk hökümetiniň Pekin Aragatnaşyk bölüminiň direktory Zou Liçun habar berdi.
“Biz öz şäherimizi her oýunda goldaýarys we geljekki oýunlarda hem olaryň has gowy netijeleri gazanmaklaryny umyt edýäris” diýip, Pekiniň Singda hukuk hyzmatlary kärhanasynyň hünärmeni Žaý Siaohong öz pikirini paýlaşdy.
Bu geçirilýän çäreleri ýaýbaňlandyrmaklyga niýetlenen mahabat ediş mazmunly wideo çykyşlary häzirki wagtda Pekiniň halkara howa menzilinde gurnalan uly ekranlarda görmek bolýar.
