Si Szinpin Phenýandaky Koreýanyň Zähmet Partiýasynyň Merkezi Hünärmenler Okuw Mekdebine baryp gördi
Sişenbe güni Hytaý Kommunistik Partiýasynyň Merkezi Komitetiniň Baş sekretary, Hytaý Halk Respublikasynyň Başlygy Si Szinpin Phenýanda ýerleşýän Koreýanyň Zähmet Partiýasynyň (KZP) Merkezi Hünärmenler Okuw Mekdebine baryp gördi.
Si Szinpiniň ýanynda Koreýanyň Zähmet Partiýasynyň Baş sekretary we Koreýa Halk Demokratik Respublikasynyň (KXDR) Döwlet işleri boýunça başlygy Kim Çen Yn hem bardy.
Mekdebiň mugallymlary we talyplaryndan ýüzlerçesi okuw jaýynyň öňünde hatara düzülip, Si Szinpini mähirli garşylady. Soňra ony Kim Çen Yn we beýleki resmi adamlar garşy aldylar.
Mekdebe aýlanyp görmegiň dowamynda iki lider mugallymyň Hytaý bilen Demirgazyk Koreýanyň arasyndaky gatnaşyklara bagyşlanan sapak geçirýän synp otagyna bardylar.
Soňra Si Szinpin bilen Kim Çen Yn uniwersitet şäherçesiniň çägini aýlanyp gördüler hem-de mekdebiň infrastrukturasy we okuw-terbiýe işi bilen tanyşdylar.
Okuw binalarynyň arasynda ýerleşýän tokaýlyk meýdançada Si Szinpin bilen Kim Çen Yn bilelikde ýylyň ähli paslynda ýaşyl bolup galýan arça agajyny ekdiler. Bu agaç iki ýurduň arasyndaky ebedi dostlugyň nyşany bolar.
Şeýle hem agaja bagyşlanan ýadygärlik daşynyň açylyş dabarasy geçirildi. Daşyň ýüzünde hytaý we koreý dillerinde: «Hytaý bilen KHDR-iň dostlugy baky dowam etsin» diýen sözler haşamlanyp ýazyldy.
Si Szinpin bilen Kim Çen Yn ýadygärlik daşynyň öňünde birek-birek bilen el gysyşyp, resmi adamlaryň we talyplaryň şowhunly el çarpyşmalary astynda ýadygärlik surata düşdüler.
Si Szinpin KHDR-iň paýtagtyna duşenbe güni Kim Çen Ynyň çakylygy boýunça iki günlük döwlet saparyny amala aşyrmak üçin geldi. Bu onuň soňky ýedi ýylyň dowamynda KHDR-e amala aşyran ilkinji saparydyr.
