Hytaýyň demir ýollary dört aýyň içinde 1,31 milliard tonna ýük daşady. "Bitewi konosament" ulgamy çykdajylary 25 göterim azaltdy
Ýük daşalyşy 0,9 göterim, intermodal gatnawlar 10,7 göterim artdy: "bitewi resminama" ulgamy boýunça 35 700 TEU we poçta ugratmalaryndaky ýükleriň yzygiderli yzarlanylmagy
CCTV+ habarlar gullugynyň habar bermegine görä, Hytaýyň milli demir ýol ulgamy ýylyň ilkinji dört aýynda 1,31 milliard tonna ýük daşady. Bu geçen ýyl bilen deňeşdirilende 0,9 göterim köpdür. Bu ösüş çykdajylary netijeli azaltmaga kömek eden "bitewi konosament" logistika hyzmaty arkaly üpjün edildi.
Aprel aýynda Hytaý demir ýollary Multimodal daşamalary ösdürmek boýunça Hytaý bileleşiginiň döredilmegine ýolbaşçylyk etdi. Maksat — logistika kompaniýalary bilen hyzmatdaşlygy berkitmek we demir ýol-suw intermodal gatnawlarynyň ösüşini çaltlandyrmakdan ybaratdyr. Häzirki wagtda "bitewi konosament" hyzmaty ýurduň ähli künjegindäki içerki ýük stansiýalaryny, şeýle hem Ýanszy derýasynyň ugrundaky iri portlary we kenarýaka sebitleri öz içine alýar.
Sian demir ýol logistika merkeziniň halkara port işewürligi bölüminiň dolandyryjysy Ýan Sze şeýle düşündirdi: «Öňler müşderiler demir ýol ulagyndan suw ulagyna geçende resminamalary birnäçe gezek gaýtadan resmileşdirmeli we konteýnerleri çalşyrmaly bolýardylar. Indi bolsa "bitewi konosament" ulgamy arkaly ähli etaplar ýeke-täk resminama bilen amala aşyrylýar, bu bolsa ýükleri başga ulaga geçirmek işini ep-esli ýönekeýleşdirýär».
Ulgam "bir töleg, bir resminama, bir sapar, bir hasaplaşyk" ýörelgesi boýunça işleýär. Ýük bütin ýol boýunça bir sany möhürlenen konteýnerde galýar. Bu bolsa demir ýol magistrallaryny port we suw serişdeleri bilen netijeli baglanyşdyrýar. Umuman alanyňda, ulgam kompaniýalaryň toplumlaýyn logistika çykdajylaryny takmynan 25 göterim azaldýar we daşama netijeliligini 30 göterimden gowrak ýokarlandyrýar.
Sian býurosynyň ýük bölüminiň multimodal daşamalar bölüminiň inženeri Ýan Şaobo «95306.cn platformasy indi deňiz gatnawlaryny sargyt ediş ulgamlary bilen maglumat alyşýar. Müşderiler diňe bir ýeke-täk ýük haty arkaly ähli eltip berme işini tamamlaman, eýsem öz ýüklerini "ekspress-eltip berme" poçtasy ýaly hakyky wagt tertibinde yzarlap bilýärler. Bu bolsa bütin daşama işini has aýdyň we düşnükli edýär» diyip, belledi.
