Şanhaýyň 1-nji köpugurly söwda merkezi: wolyňkalar, robotlar we kelt tanslary. Iň gadymy söwda merkezi nähili medeni merkeze öwrüldi?
Şotland wolyňkasy “Mo Li Hua” mukamyny çalýar, robotlar tans edýär we bokslaşýar, alyjylar bolsa göni witrinalaryň arasynda kelt tansyny öwrenýärler.
“CCTV+”-iň habar bermegine görä, Şanhaýyň meşhur Nankin köçesinde ýerleşýän taryhy söwda toplumy janly medeni we tehnologiki meýdança öwrülýär. Janly çykyşlar we futuristik attraksionlar adamlaryň uly akymyny özüne çekýär we söwda işjeňligini artdyrýar.
Şanhaýyň 1-nji söwda merkezi ilkinji gezek 1936-njy ýylda açyldy. Ol durky täzelenenden soň hem Gündogar Nankin köçesiniň esasy söwda we gelim-gidimli ýeri bolmagynda galýar.
Ýekşenbe güni mähelläniň içinde birden şotland wolyňkasynyň sesi ýaňlandy. Sazandalar Hytaýyň iň söýülýän halk aýdymy bolan “Mo Li Hua” mukamyny ýerine ýetirdiler. Ýerli ýaşaýjylar hem oňa goşulyp aýdym aýtdylar. “Nord Angliýa” halkara hytaý mekdebiniň orkestriniň ýaş wolyňkaçylary we deprekçileri Bethoweniň “Şatlyk odasyny” hem çaldylar.
Gündogar we Günbatar medeni elementleriniň garaşylmadyk utgaşmasy töweregi şatlyk duýgusyndan doldurdy. Ýerli ýaşaýjylaryň biri: “Meni bu ýere sazyň sesi çekdi. Bu hakykatdan-da täsin!” diýip belledi. Başga biri bolsa: “Men ilkinji gezek adaty şotland sazyny janly sesde diňleýärin. Bu meni bagtly etdi we joşgun berdi” diýip, bu buýançly gürrüňleriň üstüni ýetirdi.
Söwda merkeziniň içinde, Utun zalynda kelt folklor orkestri joşgunly sazlary ýerine ýetirdi. Alyjylara edil şol ýerde adaty şotland tansy bolan “keýliniň” hereketleri öwredildi. Şäheriň iň gadymy söwda merkezi açyk tans meýdançasyna öwrüldi.
Alyjylaryň biri öz täsirleri bilen paýlaşdy: “Bu täsin jadyly bir zat. Söwda merkezi tans zalyna öwrüldi. Örän hezil, gyzykly we döredijilikli”. Başga bir alyjy bolsa: “Bu maňa Paramount tans zalyny ýatladýar, ýöne bu ýer has janly. Tansdan soňra biz dükanlary aýlanarys” diýip, belledi.
Sazdan we tansdan başga-da, öňdebaryjy tehnologiýalar hem özüne çekijilik döredýär. Söwda merkeziniň öňünde robot-tansçylar öz ukyplaryny görkezýärler. Robotlaryň boks üçin ringi we adamlaryň maşynlar bilen bäsleşip biljek stol tennisi boýunça ýaryşlary işleýär.
Polşaly myhman şeýle belledi: “Şanhaý, aýratyn-da täze nesliň döwrebap şäheri hökmünde örän gowy”. Britan syýahatçysy bolsa: “Men hem bu ýere gelerin, sebäbi bu ýer başga ýerler bilen baglanyşykly” diýip, aýtdy.
Köpugurly söwda merkezine gelýänleriň akymyny ýörite arzanladyşlar we aksiýalar üçin ulanýar. Baş müdiriň orunbasary Wan Ýanan şeýle düşündirdi: “Medeniýet uly mähelläni özüne çekýär, mähelle bolsa söwdanyň bolmagyna getirýär. 5-nji maýda geçirilen söwda festiwalyndan bäri, biziň söwda merkezimizde gelim-gidimliligiň we girdejiniň artandygy hasaba alyndy. Biz tehnologiýanyň, sportuň we ýaşlyk joşgunynyň utgaşmasyny güýçlendirip, iň ýokary derejeli halkara taslamalary hödürlemegi dowam etdireris”.
Şanhaýyň 1-nji köpugurly söwda merkezi — bu diňe bir dükan däl. Bu bir sahnadyr. Wolyňkalar, robotlar, kelt tanslary we arzanladyşlar. Hytaýyň iň gadymy söwda merkezi subut edýär: medeniýet we tehnologiýa diňe bir güýmemek däl, eýsem satyp hem bilýär. Hem-de gowy satýar. Mesele robotlary görmäge näçe adamyň gelendiginde däl. Mesele olaryň näçesiniň haryt satyn almak üçin galandygynda. Soňra bolsa ýene yzyna dolanyp gelendiklerinde. Täze täsirler üçin. Tanslar üçin. Onlaýn söwdada tapyp bolmajak şol jadyly pursatlar üçin. Sebäbi söwda etmek — bu hem bir sungatdyr. Sungat bar ýerinde bolsa, elmydama tomaşaçy köpdür.
