Hytaýyň awtoulag öndürijileri elektromobiller we intellektual tehnologiýalar boýunça patent sanynda dünýäde öňe saýlanýarlar. On ýylyň içinde patentleriň sany 55 müňden 110 müňe ýetdi
2016-njy ýylda 50 müňden gowrak patent, 2025-nji ýylda bolsa 110 müňden gowrak; ýyllyk ösüş 17,1 göterim we ABŞ-nyň, Ýaponiýanyň hem-de Ýewropanyň bazarlarynda orunlaryň berkitmegi.
CCTV+ habarlar gullugynyň berýän maglumatyna görä, soňky onýyllykda intelektual eýeçilik hukugy Hytaýyň awtoulag senagatyndaky elektrik we intellektual tehnologiýalaryň esasyny düzdi. Bu bolsa dünýä bazarynda bäsdeşlige ukyplylygyň artmagyna getirdi.
Hytaýyň awtoulag barlaglar we tehnologiýalar merkezi her ýyl Hubuý welaýatynyň Uhan şäherinde awtoulag pudagynda intelektual eýeçilik meseleleri boýunça maslahat geçirýär. Merkeziň maglumatlaryna görä, Hytaý awtoulag ulgamyndaky patentleriň sany boýunça dünýädäki öňdebaryjy ornuny saklap gelýär. Iň uly ýurtlar we sebitler — ABŞ, Ýaponiýa we Ýewropa — bu hakykaty ykrar edýärler.
Täze energiýa çeşmeli ulaglar ulgamynda berlen patentleriň sany 2016-njy ýyldaky 50 müňden 2025-nji ýylda 110 müňe çenli ýokarlandy. Ýyllyk ösüş 17,1 göterime barabar boldy. Intellektual ulaglar üçin patentleriň sany bolsa şol bir döwrüň içinde 44 müňden 93 müňe çenli ösüp, ýyllyk ösüş 11,6 göterimi düzdi.
Hytaýyň awtoulag öndürijileri daşary ýurtlarda — bäşden gowrak ýurtda we sebitde öz patentlerini işjeň ýagdaýda hasaba aldyrýarlar.
«Dongfeng Motor Corporation» kompaniýasynyň barlaglar we işläp düzmeler akademiýasynyň jogapkär wekili Çžan Sin şeýle düşündirdi: «Geçen ýyl biz oýlap tapan açyşlarymyzyň bir bölegi bilen birlikde, jemi 50 müňden gowrak patent tabşyrdyk. Daşary ýurt bazarlarynda biz öz enjamlarymyzy we brendlerimizi Ýewropa we Günorta-Gündogar Aziýa eksport etmek ýaly platformalarda ýerleşdirmäge ünsümizi jemleýäris. Şeýle hem biz halkara derejesinde intelektual eýeçilik ulgamyndaky töwekgelçiliklere gözegçilik etmek we duýdurmak mehanizmlerini döredýäris».
Ekspertler dünýäniň awtoulag senagatynyň düýpli özgerişler döwrüni başdan geçirýändigini belleýärler. Algoritmler we elektron enjamlary ýaly ugurlarda patentler çalt depginler bilen köpelýär. Bu tehnologiýalar boýunça berilýän arzalaryň sany soňky bäş ýylda birnäçe esse artdy. Bu pudaklardaky intelektual eýeçilik täze awtoulag dünýäsinde esasy orny eýeleýär.
“CATARC”-yň baş hünärmeni Wan Sźunleý «Daşary ýurtlardan gelýän arzalaryň sanynyň artmagy bilen, Hytaýyň awtoulag senagaty intellektual eýeçilik ulgamynyň ösüşini çaltlandyrar, ählumumy patent bukjasyny berkider, halkara hyzmatdaşlygy üçin duýduryş mehanizmlerini we ýörite hünärmenleri taýýarlar. Bularyň hemmesi intellektual eýeçiligiň saýasynda pudagyň ýokary hilli ösmegini we onuň dünýä derejesinde giňelmegini kepillendirer» — diýip, belledi.
Hytaý diňe bir elektromobil öndürmek bilen çäklenmeýär. Ol geljegiň patentini alýar. 110 müň patent — bu ýöne bir san däl. Bu bäsdeşler üçin goýlan böwetdir. Beýleki ýurtlar olara ýetişjek bolýarkalar, Hytaý eýýäm algoritmleri, elektronikany we dolandyryş ulgamlaryny hasaba aldyrýar. Ýewropa, ABŞ we Ýaponiýa bu liderligi ykrar edýärler. “Dongfeng Motor” diňe bir Hytaýda däl, eýsem Günorta-Gündogar Aziýada we Ýewropada hem patent alýar. Mesele Hytaýyň öz liderligini saklap biljekdiginde däl. Mesele — awtoulag eýýamynyň intelektual eýeçilik eýýamyna öwrülendigine dünýäniň haçan düşunjekdigidir. Patentler bolsa — täze ýangyçdyr. Hytaýda bolsa bu ýangyç artyklamasy bilen bar.»
