Dört aýyň içinde bir milliard bäş ýüz elli bäş million ýolagçy. Hytaýyň demir ýollary rekordlary täzeleýär we adamlar hem-de olaryň öý haýwanlary üçin has amatly bolýar.
6,8 göterim ösüş, günde 11 574 otly, daşary ýurtlylara hyzmat etmek üçin hyzmatlar üçden bir esse artdy, 126 duralgada bolsa indi öý haýwanlary kabul edilýär.
“CCTV+”-iň habar bermegine görä, 2026-njy ýylyň ilkinji dört aýynda Hytaýyň demir ýollary bir milliard bäş ýüz elli bäş million ýolagça hyzmat etdi. Bu geçen ýyla garanyňda 6,8 göterim köpdür. Ortaça her gün 11 574 ýolagçy otlusy gatnady — bu bolsa 6,3 göterim artandygyny görkezýär.
Ulgam ýokary tizlikli otlularyň ulanyş gerimini saklap galdy we oba ýerlerini ösdürmek üçin pes tizlikli ýolagçy otlularyny ulanmagy dowam etdirdi. Bu ýurduň iň çetki künjeklerindäki adamlaryň özlerini uly dünýäden üzňe duýmazlygy üçin edilýär.
Serhetüsti gatnawlaryna gelsek, Hytaý-Laos demir ýoly 143 müň ýolagçyny gatnatdy — bu 36,3 göterim ösüş diýmekdir. Guanžou-Şenžen-Gonkong ýokary tizlikli demir ýoly bolsa 11 million 777 müň ýolagça hyzmat etdi, bu bolsa 14,8 göterim ýokarydyr.
Hytaý demir ýollarynyň Ýolagçy gatnatmak merkeziniň marketing boýunça müdiriniň orunbasary Çžan Teszin şeýle belledi: «Biz ýurdumyzyň wizasyz syýasatynyň netijesinde ýolagçy akymynyň köpelmegine işjeň uýgunlaşdyk hem-de daşary ýurtly syýahatçylar üçin köp dilli hyzmatlary we ýönekeýleşdirilen şertleri döretdik. Ýurt möçberinde ilkinji dört aýyň dowamynda demir ýol ulgamy 7 million 829 müň daşary ýurtly syýahatça hyzmat etdi, bu bolsa geçen ýyldakydan 33,9 göterim köpdür».
Häzirki wagtda 8 müňden gowrak ýokary tizlikli otly restoran-wagon hyzmatyny hödürleýär. 126 beketde we 265 otlyda öý haýwanlaryny gatnatmaga rugsat berilýär. 111 beketde goşlary eltip bermek we kabul etmek hyzmaty işleýär. 93 beketde bolsa iýmit sargyt edip bolýar.
Demir ýol syýahatçylygyny ösdürmek üçin ýerli operatorlar we syýahatçylyk edaralary ýanwar-aprel aýlary aralygynda 1020 sany syýahatçylyk otlusyny ýola goýdy.
«Biz „demir ýol plýus“ konsepsiýasynyň çäginde täze sarp ediş ssenariýalaryny işläp düzdük. Sport çärelerine, sergilere, şoulara we okuw gezelençlerine bolan dürli görnüşli islegleri kanagatlandyrmak üçin, biz sport janköýerleri we okuw turlary üçin ýörite otlulary döretdik. Bu täze syýahatçylyk toparlaryny özüne çekmäge we demir ýol ugurlarynyň boýundaky medeni hem-de syýahatçylyk hyzmatlarynyň sarp edilişini netijeli höweslendirmäge gönükdirilendir» diýip, Çžan sözüniň üstüni ýetirdi.
Hytaý otlulary indi diňe bir gatnaw serişdesi däl. Olar durmuşyň bir bölegine öwrüldi. Ýokary tizlikli otlylar janköýerleri oýunlara, maşgalalary ene-atalarynyň ýanyna, syýahatçylary bolsa täze künjeklere äkidýär. Pişikleri we itleri bolsa indi öýde galdyrmak gerek däl. Rekord goýýan sanlar haýran galdyrýar, ýöne has möhümi başga zat: ulgam adama tarap ýüzlendi. Adamlar bolsa muňa jogap berdi — dört aýyň içinde bir ýarym milliard gezek. Sebäbi ýol amatly bolanda, adamlar has höwesli syýahat edýärler. Ýolda naharlanyp, ýanyň bilen öý haýwanyňy alyp we serhetde kagyz dolduryp oturmak gerek bolmadyk wagty bolsa — has hem ýygy gatnaýarlar.
