Hytaý benziniň we dizel ýangyjynyň bahalaryny ýokarlandyrar
Hytaý halkara nebit bahalaryndaky soňky üýtgeşmeleri nazara alyp, şenbe gününden başlap benzin we dizel ýangyjynyň bölek satuw bahalaryny ýokarlandyrar. Bu barada anna güni ýurduň esasy ykdysady meýilleşdiriş edarasy habar berdi.
Milli ösüş we özgertmeler komissiýasy (NDRC) benziniň her tonnasynyň bahasynyň 320 ýuan (takmynan 47 ABŞ dollary), dizeliň bolsa 310 ýuan ýokarlanandygyny mälim etdi. Iň köp ulanylýan benziniň 50 litrlik ýangyç gabyny doldurmak takmynan 12,5 ýuan gymmatlar.
Bahalaryň ýokarlanmagy Ýakyn Gündogardaky konfliktiň we dünýä nebit üpjünçiliginiň bäşden bir böleginiň geçýän Ormuz bogazyndaky bökdençlikler sebäpli ýüze çykan näbellilik bilen baglanyşyklydyr. Şeýle-de bolsa, Eýran bilen ABŞ-nyň arasyndaky dartgynlylyk gowşap başlady, BAE bolsa Nebit eksport ediji döwletleriň guramasyndan çykdy. Şondan soň bu gurama iýun aýynda önümçiligi günde 188 müň barrel artdyrjakdygyny yglan etdi.
Muňa garamazdan, häzirki wagtda çig nebit üpjünçiliginde ýetmezçilik dowam edýär we bu köp pudaklara täsir edýär. Hususan-da, awiakompaniýalar tomusky möwsüm üçin takmynan 75 müň gatnawy ýatyrdylar. Analitikler halkara nebit bahalarynyň gysga möhletde durnuksyz bolmagynda galyp biljekdigini çaklaýarlar.
Hytaýyň çig mal bazary boýunça iň iri maglumat-seljeriş agentligi bolan SCI99-yň analitigi Çžan Szinýiniň aýtmagyna görä, Ormuz bogazy üç aýdan soň täzeden açylan ýagdaýynda hem nebit önümçiliginiň diňe 70 göterimini dikeltmek mümkin bolar.
